കോഴിക്കോട്: തൊഴില്‍ തേടിയുളള കുടിയേറ്റം സമ്മാനിച്ച സൗഹൃദവും അനുഭവങ്ങളും പങ്കുവെച്ച് ‘റിയാദ് ഡയസ്‌പോറ’ കോഴിക്കോട് റാവിസ് കടവ് റിസോര്‍ട്ടില്‍ സംഗമിച്ചു. അഞ്ചു പതിറ്റാണ്ടിനിടെ സൗദി തലസ്ഥാന നഗരിയില്‍ പ്രവാസികളായവര്‍ ‘റിയാദ് റൂട്‌സ് റീ യൂണിയന്‍’ എന്ന പേരിലാണ്‌ സംഗമിച്ചത്. പരിപാടി പൊതുമരാമത്ത് ടൂറിസം വകുപ്പ് മന്ത്രി പി എ മുഹമ്മദ് റിയാസ് ഉദ്ഘാടനം ചെയ്തു.
സൗഹൃദ കൂട്ടങ്ങള്‍ ഉണ്ടാകുന്നത് നാടിന് ഉപകാരപ്രദമാണെന്നും ഗള്‍ഫ് പൗരന്മാരായ ടൂറിസ്റ്റുകള്‍ കേരളത്തിലേക്ക് കൂടുതല്‍ എത്തിത്തുടങ്ങിയെന്നും മന്ത്രി പറഞ്ഞു. വയനാട്ടിലെ ദുരന്തത്തില്‍ പെട്ട കുടുംബങ്ങളുടെയും അവരുടെ പുനരധിവാസവും മന്ത്രി വിശദീകരിച്ചു.ലോകത്തിന്റെ വിവിധ ദിക്കുകകളില്‍ നിന്ന് പ്രതിനിധികളെത്തി. നേരത്തെ റിയാദ് പ്രവാസികളായിരുന്നവര്‍ പലരും ഇപ്പോള്‍ തെഴിലും നിക്ഷേപകരുമായി ലോകത്തിന്റെ പലയിടത്തും ചിതറിക്കിടക്കുകയാണ്. ഓര്‍മ്മ പുതുക്കാനുള്ള അപൂര്‍വ്വ സംഗമത്തിന് വേദിയൊരുങ്ങിയപ്പോള്‍ സാധ്യമായവരെല്ലാം കോഴിക്കോട്ടെത്തി.
സമ്മേളനത്തിന്റെ ആദ്യ സെഷന്‍ ഡോക്ടര്‍. അബ്ദുസ്സമദ് സമദാനി എംപി ഉദ്ഘാടനം ചെയ്തു. വേര് തേടിയുള്ള യാത്രയും വേരുകള്‍ കൂട്ടി ഇണക്കിയുള്ള സംഗമവും മികച്ച കാഴ്ചയും അനുഭവവുമാണ് സമ്മാനിച്ചതെന്ന് സമാദാനി പറഞ്ഞു. പ്രവാസികളുടെ വിശാല കാഴ്ചപ്പാടിനെയും നിഷ്‌കപടമായ പ്രവര്‍ത്തനങ്ങളെയും സമദാനി അഭിനന്ദിച്ചു. കരുണയുടെ പര്യായമാണ് ഓരോ പ്രവാസിയുമെന്നും അദ്ദേഹം പറഞ്ഞു.
വര്‍ഷങ്ങളോളം ഒരേ റൂമില്‍ താമസിച്ചവരും ഒരേ സ്ഥലത്ത് തൊഴിലെടുത്തവരും കാലങ്ങള്‍ക്ക് ശേഷം കണ്ട് മുട്ടിയപ്പോള്‍ വൈകാരിക രംഗങ്ങള്‍ക്ക് ഡയസ്‌പോറ സാക്ഷിയായി. വിശിഷ്ടാതിഥിയായി പങ്കെടുത്ത ഡോ: എം കെ മുനീര്‍ എംഎല്‍എ ഡയസ്‌പോറയെന്ന ആശയത്തെ അഭിനന്ദിച്ചു. പ്രവാസികളുടെ വൈകാരിക അടുപ്പത്തെ കുറിച്ചും കൂട്ടമായുടെ ആവശ്യകതയും പങ്കുവെച്ച മുനീര്‍ ഗാനം ആലപിച്ചാണ് മടങ്ങിയത്. റിയാദ് പ്രവാസികള്‍ ഒരു കാലത്ത് ഏറെ ആസ്വദിച്ച പ്രവാസി കലാകാരന്മാരുടെ ശബ്ദം ഡയസ്‌പോറയുടെ വേദിയില്‍ വീണ്ടും മുഴങ്ങി. എണ്‍പതുകള്‍ മുതല്‍ റിയാദില്‍ പാടിയിരുന്ന ഗായകരും ഗായികമാരും ഡയസ്‌പോറയില്‍ പാട്ടിനൊപ്പം ചുവടു വച്ചു.
മൂന്നാം സെഷനിലെത്തിയ ടി സിദ്ധിഖ് എം എല്‍ പ്രവാസി സുഹൃത്തുക്കളുടെ കരുതലിനെ കുറച്ചും നാട് വിപത്തുകള്‍ നേരിടുമ്പോള്‍ അവരൊരുമിച്ച് ചെയ്യുന്ന നന്മ നിറഞ്ഞ പ്രവര്‍ത്തനങ്ങളും പറഞ്ഞു. ഗായകരായ റാസയും ബീഗവും നയിച്ച ഗസല്‍ വിരുന്നും അരങ്ങേറി.
ചെയര്‍മാന്‍ ഷക്കീബ് കൊളക്കാടന്‍ അധ്യക്ഷ്യത വഹിച്ചു. ചീഫ് കോഡിനേറ്റര്‍ നൗഫല്‍ പാലക്കാടന്‍ ആമുഖവും ജനറല്‍ കണ്‍വീനര്‍ നാസര്‍ കാരന്തൂര്‍ സ്വാഗതവും പറഞ്ഞു. അഡൈ്വസറി ബോര്‍ഡ് ചെയര്‍മാന്‍ അഷ്‌റഫ് വേങ്ങാട്ട് റിയാദ് ഡയസ്‌പോറയുടെ ലക്ഷ്യം വിശദീകരിച്ചു. ട്രഷറര്‍ ബാലചന്ദ്രന്‍ നായര്‍ നന്ദി പറഞ്ഞു. അയൂബ്ഖാന്‍, ഉബൈദ് എടവണ്ണ, ഷാജി ആലപ്പുഴ, നാസര്‍ കാരക്കുന്ന്, ബഷീര്‍ പാങ്ങോട്, എന്നിവര്‍ പരിപാടികള്‍ക്ക് നേതൃത്വം നല്‍കി.
അഡ്വ: അനില്‍ ബോസ്,ഡോ: സൂരജ് പാണയില്‍, ടി എം അഹമ്മദ് കോയ, എന്‍. എം ശ്രീധരന്‍ കൂള്‍ ടെക്, ഷാജി കുന്നിക്കോട്, ബഷീര്‍ മുസ്ലിയാരകത്ത്, ഡേവിഡ് ലൂക്ക്, മുഹമ്മദ് കുട്ടി പെരിന്തല്‍മണ്ണ, മജീദ് ചിങ്ങോലി,സലിം കളക്കര, അഡ്വ: സൈനുദ്ധീന്‍ കൊച്ചി, ഫസല്‍ റഹ്മാന്, മുഹമ്മദലി മുണ്ടോടന്‍, മുഹമ്മദ് അലി വേങ്ങാട്ട്, റാഫി കൊയിലാണ്ടി, ഷീബ രാമചന്ദ്രന്‍, പ്രമുഖ മാധ്യമ പ്രവര്‍ത്തകന്‍ സി കെ ഹസ്സന്‍കോയ, ഇസ്മായില്‍ എരുമേലി തുടങ്ങി അറുനൂറിലധികം പ്രതിനിധികള്‍ പങ്കെടുത്തു.
വാര്‍ത്തകള്‍ editor@sauditimesonline.com എന്ന വിലാസത്തില്‍ ഇമെയില്‍ ചെയ്യുക. വാര്‍ത്തകള്‍ അയക്കുന്നവര്‍ പേരും മൊബൈല്‍ നമ്പരും എഴുതാന്‍ മറക്കരുത്‌.
