റിയാദ്: സൗദിയില് നിയമ ലംഘകരായ 21,058 വിദേശികളെ അറസ്റ്റ് ചെയ്തതായി ആഭ്യന്തര മന്ത്രാലയം. ജൂലൈ നാല് മുതല് പത്ത് വരെ രാജ്യത്തെ വിവിധ പ്രവിശ്യകളില് നടത്തിയ പരിശോധനകളിലാണ് നിയമലംഘകര് പിടിയിലായത്. പൊതു സുരക്ഷാസേന, പാസ്പോര്ട്ട് ഡയറക്ടറേറ്റ് എന്നിവ സംയുക്തമായാണ് പരിശോധന നടത്തിയത്. പിടിയിലായവരില് 12,588 പേര് ഇഖാമ പുതുക്കാത്തവരും തൊഴിലുടമയില് നിന്ന് ഒളിച്ചോടിയവരുമാണ്. 5,500 അതിര്ത്തി സുരക്ഷാ ലംഘകരും 3,000 തൊഴില് നിയമലംഘകരുമാണെന്നും ആഭ്യന്തര മന്ത്രാലയം അറിയിച്ചു.
അനധികൃതമായി അതിര്ത്തി കടക്കാന് ശ്രമിക്കുന്നതിനിടെ 2,072 പേര് അറസ്റ്റിലായി. ഇവരില് 52 ശതമാനവും എത്യോപ്യന് പൗരന്മാരാണ്. 47 ശതമാനം യമനികളും ഒരു ശതമാനം മറ്റ് രാജ്യക്കാരുമാണ്. അനധികൃതമായി രാജ്യത്തു നിന്ന് പുറത്തുകടക്കാന് ശ്രമിക്കുന്നതിനിടെ 28 പേര് അറസ്റ്റിലായി. താമസ, ജോലി, അതിര്ത്തി സുരക്ഷാ നിയമലംഘകര്ക്ക് വിവിധ സഹായങ്ങള് നല്കിയ 37 പേര് വേറെയും പിടിയിലായിട്ടുണ്ട്. നിലവില് നടപടികള് നേരിടുന്ന 14,184 നിയമലംഘകരില് 12,418 പുരുഷന്മാരും 1,766 സ്ത്രീകളുമാണ്.
വാര്ത്തകള് editor@sauditimesonline.com എന്ന വിലാസത്തില് ഇമെയില് ചെയ്യുക. വാര്ത്തകള് അയക്കുന്നവര് പേരും മൊബൈല് നമ്പരും എഴുതാന് മറക്കരുത്.
