റിയാദ്: നാലു പതിറ്റാണ്ട് നീണ്ട പ്രവാസം അവസാനിപ്പിച്ച് അഷറഫ് വടക്കേവിള നാട്ടിലേക്ക് മടങ്ങുന്നു. സാമൂഹ്യ സാംസ്‌കാരിക മേഖലകളില്‍ നിറസാന്നിധ്യമായിരുന്ന അഷറഫ് വടക്കേവിള കക്ഷി രാഷ്ട്രീയ ഭേദമന്യേ പ്രവാസി മലയാളികളുടെ സ്‌നേഹാദരവുകള്‍ നേടിയ സാമൂഹ്യപ്രവര്‍ത്തകനാണ്. കോണ്‍ഗ്രസ്സിന്റെ പ്രവാസി സംഘടനയായ ഓഐസിസിയുടെ നേതൃനിരയില്‍ പ്രവര്‍ത്തിക്കുമ്പോള്‍ തന്നെ റിയാദിലെ പ്രവാസി മലയാളി കൂട്ടായ്മകളേയും മുഖ്യധാരാ സംഘടനകളേയും കൂട്ടിയിണക്കി. അത്തരം സംഘടനകളുടെ കോര്‍ഡിനേഷന്‍ കമ്മിറ്റി എന്ന നിലയില്‍ എന്‍ആര്‍കെ ഫോറം രൂപീകരിക്കുന്നതിലും അതിന്റെ പ്രവര്‍ത്തനം നല്ല നിലയില്‍ മുന്നോട്ടു കൊണ്ടുപോകുന്നതിലും മുഖ്യ പങ്കുവഹിച്ചു. അതോടൊപ്പം റിയാദിലെ മറ്റു മുഖ്യധാരാ രാഷ്ട്രീയ സാമൂഹ്യ പ്രവാസി സംഘടനകളുമായി നല്ല ബന്ധം നിലനിര്‍ത്താനും അദ്ദേഹത്തിനു കഴിഞ്ഞിട്ടുണ്ട്.
1982 നവംബറിലാണ് അഷറഫ് വടക്കേവിള പ്രവാസം ആരംഭിച്ചത്. അമേരിക്കന്‍ കമ്പനിയായ ഐആന്‍ഡ് സൗദി അറേബ്യയുടെ സ്‌പോണ്‍സര്‍ഷിപ്പില്‍ കിംഗ് അബ്ദുള്‍അസീസ് മിലിട്ടറി അക്കാദമിയില്‍ കാറ്ററിങ്ങ് സെക്ഷനില്‍ ജോലിയില്‍ പ്രവേശിച്ചു. പിന്നീട് മറ്റൊരു കമ്പനിയുടെ സ്‌പോണ്‍സര്‍ഷിപ്പിലേക്ക് മാറി. നാലു വര്‍ഷത്തിന് ശേഷം ജോലി ചെയ്തിരുന്ന പ്രൊജക്ട് മിനിസ്ട്രി ഓഫ് ഡിഫന്‍സ് ഏറ്റെടുത്തു. മുഴുവന്‍ ജീവനക്കാരും മിനിസ്ട്രിയുടെ സ്‌പോണ്‍സര്‍ഷിപ്പിലായി. സുപ്പര്‍വൈസറായി പ്രൊമോഷന്‍ ലഭിക്കുകയും ജോലി തുടരുകയുമായിരുന്നു.
റിയാദിലെ പൊതുപ്രവര്‍ത്തനത്തിനിടെ നിരവധി സാമൂഹ്യ സാംസ്‌കാരിക സംഘടനകളുടെ രൂപീകരണത്തിലും പ്രവര്‍ത്തനത്തിലും അഷറഫ് വടക്കേവില നേതൃത്വം നല്‍കി. 1995ല്‍ കേരള ദേശീയവേദിയുടെ പ്രസിഡന്റ്, 1997ല്‍ റിയാദ് ഇന്ത്യന്‍ കള്‍ച്ചറല്‍ കോണ്‍ഗ്രസ്സിന്റെ (ആര്‍ഐസിസി) ജനറല്‍ സെക്രട്ടറി, 1989 മുതല്‍ 2004 വരെ നെഹ്‌റു സാംസ്‌കാരികവേദിയുടെ വൈസ് പ്രസിഡന്റ്, 2005ല്‍ ഇന്ത്യന്‍ കള്‍ച്ചറല്‍ കോണ്‍ഗ്രസ് വൈസ് പ്രസിഡന്റ്, പ്രസിഡന്റ്, 2013ല്‍ എന്‍ആര്‍കെ വെല്‍ഫെയര്‍ ഫോറം എക്‌സിക്യുട്ടീവ് മെമ്പര്‍, ട്രഷറര്‍, ജനറല്‍ കണ്‍വീനര്‍. നിലവില്‍ ചെയര്‍മാന്‍ സ്ഥാനം വഹിക്കുന്നു. കൂടാതെ 2000 മുതല്‍ ഓഐസിസി സൗദി നാഷണല്‍ കമ്മിറ്റി വൈസ് പ്രസിഡന്റ്, ആക്ടിംഗ് പ്രസിഡന്റ് എന്നീ സ്ഥാനങ്ങളും വഹിച്ചിരുന്നു. ബത്ഹ അഗ്‌നിബാധ ദുരിതാശ്വാസ പ്രവര്‍ത്തനങ്ങളും കേരളത്തിലെ പ്രളയ ദുരിതാശ്വാസവുമായി ബന്ധപ്പെട്ട് എന്‍ ആര്‍ കെ വെല്‍ഫെയര്‍ ഫോറം നടത്തിയ ദുരിതാശ്വാസ നിധി ഏകോപിപ്പിക്കുന്നതിലും വടക്കേവിളയുടെ നേതൃത്വം ശ്രദ്ധനേടി.
കൊല്ലം വടക്കേവിളയാണ് സ്വദേശം. ഭാര്യ, മൂന്നു മക്കള്‍. ബിടെക്ക് ബിരുദധാരിയായ മൂത്ത മകള്‍ നിഷ ബാദുഷ വിവാഹിതയാണ്. മകന്‍ സല്‍മാന്‍ അഷറഫ് എംടെക്ക് ബിരുദധാരിയാണ്. ഐടിഐ ഡിപ്ലോമ നേടിയ സുല്‍ത്താന്‍ അഷറഫ് ആണ് മൂന്നാമത്തെ മകന്‍. എട്ട് വര്‍ഷം കുടുംബം റിയാദിലുണ്ടായിരുന്നു. ജൂണ്‍ 26 ന് ശനിയാഴ്ച വൈകുന്നേരം 6ന് അപ്പോളോ ഡിമോറ ഓഡിറ്റോറിയത്തില്‍ എന്‍ ആര്‍ കെ വെല്‍ഫെയര്‍ ഫോറത്തിന്റെ ആഭിമുഖ്യത്തില്‍ അഷ്‌റഫ് വടക്കേവിളക്ക് യാത്രയയപ്പ് നല്‍കും.
വാര്‍ത്തകള്‍ editor@sauditimesonline.com എന്ന വിലാസത്തില്‍ ഇമെയില്‍ ചെയ്യുക. വാര്‍ത്തകള്‍ അയക്കുന്നവര്‍ പേരും മൊബൈല്‍ നമ്പരും എഴുതാന്‍ മറക്കരുത്‌.
