റിയാദ്: സൗദിയില് ആശുപത്രി ജീവനക്കാരിക്ക് കൊവിഡ് സ്ഥിരീകരിച്ചു. റിയാദ് കിംഗ് ഫൈസല് സ്പെഷ്യലിസ്റ്റ് ഹോസ്പിറ്റല് ആന്റ് റിസര്ച്ച് സെന്ററിലെ ജീവനക്കാരിക്കാണ് മാര്ച്ച് 19ന് കൊവിഡ് വൈറസ് സ്ഥിരീകരിച്ചത്. കൊവിഡ് വൈറസ് പൊട്ടിപുറപ്പെട്ട രാജ്യത്ത് നിന്നു ഒരാഴ്ച മുമ്പ് എത്തിയ വീട്ടുജോലിക്കാരിയുമായി രോഗം സ്ഥിരീകരിച്ച സ്ത്രീ സമ്പര്ക്കം പുലര്ത്തിയിരുന്നു. രോഗിയുടെ ആരോഗ്യ നില തൃപ്തികരമാണ്. അവര് ബന്ധപ്പെട്ട മുഴുവന് ആളുകള്ക്കും മെഡിക്കല് പരിശോധന തുടരുകയാണ്. പുറത്തുവന്ന ഫലങ്ങള് നെഗറ്റീവ് ആണെന്നും ആശുപത്രി അറിയിച്ചു. ആരോഗ്യ മന്ത്രാലയം കഴിഞ്ഞ ദിവസം പുറത്തുവിട്ട പട്ടികയില് കിംഗ് ഫൈസല് സ്പെഷ്യലിസ്റ്റ് ഹോസ്പിറ്റല് ജീവനക്കാരിയും ഉള്പ്പെട്ടിട്ടുണ്ടെന്നും അധികൃതര് വ്യക്തമാക്കി.