റിയാദ്: കിംഗ് ഖാലിദ് ഇന്റര്‍നാഷണല്‍ എയര്‍പോര്‍ട്ടില്‍ സാമൂഹിക അകലം പാലിക്കുന്നത് നിരീക്ഷിക്കാന്‍ ആര്‍ട്ടിഫിഷ്യല്‍ ഇന്റലിജന്‍സ് സംവിധാനം. കൊവിഡിന്റെ പശ്ചാത്തലത്തില്‍ ആരോഗ്യ സുരക്ഷ ഉറപ്പുവരുത്തുന്നതിന് ‘ഇന്ററാക്ടീവ് അനാലിസിസ്’ എന്ന പേരിലാണ് സംവിധാനം ഒരുക്കിയതെന്ന് റിയാദ് എയര്‍പോര്‍ട്‌സ് കമ്പനി അറിയിച്ചു. പശ്ചിമേഷ്യയിലെ വിമാനത്താവളങ്ങളില്‍ ഇത്തരം സംവിധാനം ആദ്യമായാണ് നടപ്പിലാക്കുന്നത്. ആര്‍ട്ടിഫിഷ്യല്‍ ഇന്റലിജന്‍സ് സോഫ്റ്റ്‌വെയറും മെഷീന്‍ ലേണിംഗ് ടെക്‌നോളജികളും ഉപയോഗിച്ചാണ് പദ്ധതി നടപ്പിലാക്കിയത്. വിമാനത്താവളത്തിലെത്തുന്ന യാത്രക്കാരും ജീവനക്കാരും ഉള്‍പ്പെടെ മുഴുവന്‍ ആളുകളും സാമൂഹിക അകലം പാലിക്കുന്നുണ്ടെന്ന് ഉറപ്പുവരുത്തുന്നതിന് ഇന്ററാക്ടീവ് അനാലിസിസിന് കഴിയും. നിലവില്‍ അഞ്ചാം നമ്പര്‍ ടെര്‍മിനലാലാണ് പദ്ധതി നടപ്പിലാക്കിയിട്ടുളളത്.
വിമാനത്താവളത്തില്‍ തിരക്ക് വര്‍ധിക്കുകയോ, സാമൂഹിക അകലം പാലിക്കാതെ യാത്രക്കാര്‍ നീങ്ങുകയോ ചെയ്താല്‍ വിമാനത്താവളത്തിലെ ജീവനക്കാര്‍ക്ക് സോഫട്‌വെയര്‍ വഴി ജാഗ്രതാ സന്ദേശം ലഭിക്കും. ഇത്തരത്തില്‍ സുരക്ഷ ഉറപ്പുവരുത്തുന്ന സംവിധാനമാണ് ഏര്‍പ്പെടുത്തിയിട്ടുളളത്.
വാര്‍ത്തകള്‍ editor@sauditimesonline.com എന്ന വിലാസത്തില്‍ ഇമെയില്‍ ചെയ്യുക. വാര്‍ത്തകള്‍ അയക്കുന്നവര്‍ പേരും മൊബൈല്‍ നമ്പരും എഴുതാന്‍ മറക്കരുത്‌.
