റിയാദ്: കേളി കലാസാംസ്‌കാരിക വേദി പ്രഥമ ക്രിക്കറ്റ് ടൂര്‍ണമെന്റ് ‘സഫാ മക്ക കേളി മെഗാ ക്രിക്കറ്റ് 2022 ഫൈനല്‍ ഡിസംബര്‍ 23ന് സുലൈ എം സി എ ഗ്രൗണ്ടില്‍ അരങ്ങേറും. പാരമൗണ്ട്, ആഷസ് എന്നീ ക്രിക്കറ്റ് ക്‌ളബ്ബുകള്‍ ഫൈനല്‍ മത്സരത്തില്‍ മാറ്റുരക്കും.
ടൂര്‍ണമെന്റിന്റെ എട്ടാം വാരം നടന്ന ആവേശകരമായ സെമി ഫൈനല്‍ മത്സരങ്ങളില്‍ പാരമൗണ്ട് ക്ലബ്ബ് അല്‍ ഉഫുക് ക്ലബ്ബിനെ 7 വിക്കറ്റിനു തകര്‍ത്തു. ആഷസ് ക്ലബ്ബ് മാസ്‌റ്റേഴ്‌സ് റിയാദിനെ 6 വിക്കറ്റിനും മുട്ടുകുത്തിച്ചു. സെമി ഫൈനലില്‍ മാന്‍ ഓഫ് ദി മാച്ച് ആയി പാരമൗണ്ടിന്റെ നുമാന്‍, ആഷസിന്റെ വിഷ്ണുജിത്ത് എന്നിവരെ തെരഞ്ഞെടുത്തു. അമ്പയനമാരായ ഷാബി അബ്ദുല്‍സലാം, മഹേഷ്, അജു, ചാക്കോ എന്നിവര്‍ കളികള്‍ നിയന്ത്രിച്ചു.
വിജയികള്‍ക്ക് ഉസ്താദ് ഹോട്ടല്‍ വിന്നേഴ്‌സ് ട്രോഫിയും സഖാവ് കെ.വാസു ഏട്ടന്‍ ആന്റ് അസാഫ് നല്‍കുന്ന വിന്നേഴ്‌സ് പ്രൈസ് മണിയും സമ്മാനിക്കും. സഫാമക്കാ റണ്ണേഴ്‌സ് ട്രോഫിയും മോഡേണ്‍ എജ്യൂകേഷന്‍ നല്‍കുന്ന റണ്ണേഴ്‌സ് പ്രൈസ് മണിയും വിതരണം ചെയ്യും. കൂടാതെ സെമി ഫൈനലില്‍ പുറത്ത് പോയ ടീമുകള്‍ക്ക് സംഘാടക സമിതി ക്യാഷ് അവാര്‍ഡും വിവിധ വ്യക്തിഗത ട്രോഫികളും വിതരണം ചെയ്യും.
വാര്‍ത്തകള്‍ editor@sauditimesonline.com എന്ന വിലാസത്തില്‍ ഇമെയില്‍ ചെയ്യുക. വാര്‍ത്തകള്‍ അയക്കുന്നവര്‍ പേരും മൊബൈല്‍ നമ്പരും എഴുതാന്‍ മറക്കരുത്‌.
