റിയാദ്: കേന്ദ്ര ഹജ്ജ് കമ്മിറ്റി നടപ്പിലാക്കിയ ഹ്രസ്വകാല ഹജ്ജ് പാക്കേജില് വിദേശ ഇന്ത്യക്കാര്ക്കായി (എന്.ആര്.ഐ) പ്രത്യേക സീറ്റ് സംവരണം ഏര്പ്പെടുത്തണമെന്ന് ഐ.സി.എഫ് ആവശ്യപ്പെട്ടു. ഹജ്ജ് തീര്ഥാടകരുടെ മാറിക്കൊണ്ടിരിക്കുന്ന ആവശ്യങ്ങള് പരിഗണിച്ചു കേന്ദ്ര സര്ക്കാര് കഴിഞ്ഞ വര്ഷം ആരംഭിച്ച 20 ദിവസത്തെ ഹ്രസ്വകാല പാക്കേജ് ഏറെ കാലോചിതമായ നടപടിയാണെന്ന് ഐ.സി.എഫ് വിലയിരുത്തി.
ലോകത്തിന്റെ വിവിധ ഭാഗങ്ങളില് ജോലി ചെയ്യുന്ന ലക്ഷക്കണക്കിന് ഇന്ത്യന് പ്രവാസികള്ക്ക് പുതിയ പദ്ധതി വലിയ അനുഗ്രഹമാകും. നിലവിലുള്ള സാധാരണ ഹജ്ജ് പാക്കേജുകള്ക്ക് കൂടുതല് ദിവസത്തെ ലീവ് ആവശ്യമായി വരുന്നത് പ്രവാസികള്ക്ക് പലപ്പോഴും പ്രതിസന്ധി സൃഷ്ടിക്കാറുണ്ട്. എന്നാല് പുതുതായി അവതരിപ്പിച്ച ഷോര്ട്ട് പാക്കേജ് നിരവധി തീര്ഥാടകര്ക്ക് പ്രായോഗികവും സൗകര്യപ്രദവുമായ അവസരമാണ് ഒരുക്കുന്നത്.
വിദേശ രാജ്യങ്ങളിലെ കര്ശനമായ ഹജ്ജ് ക്വാട്ടാ സംവിധാനങ്ങളും പ്രാദേശിക ചട്ടങ്ങളും കാരണം പല ഇന്ത്യന് പ്രവാസികള്ക്കും അവര് താമസിക്കുന്ന രാജ്യങ്ങളില് നിന്ന് ഹജ്ജ് നിര്വഹിക്കാന് സാധിക്കാറില്ല. അതിനാല് ഇവര്ക്ക് ഇന്ത്യ വഴി ഹജ്ജ് യാത്ര തിരഞ്ഞെടുക്കേണ്ടി വരുന്നു. എന്നാല് ദീര്ഘകാല ഹജ്ജ് പാക്കേജുകള്ക്ക് അനുസരിച്ച് ജോലി സ്ഥലങ്ങളില് നിന്നും ദീര്ഘനാള് അവധി ലഭിക്കാത്തത് ഇവര്ക്ക് വലിയ ബുദ്ധിമുട്ടാണ് ഉണ്ടാക്കുന്നത്.
ഈ സാഹചര്യം മുന്നിര്ത്തി ഹ്രസ്വകാല ഹജ്ജ് പാക്കേജില് വിദേശ ഇന്ത്യക്കാര്ക്കായി പ്രത്യേക സംവരണമോ ക്വാട്ടയോ ഏര്പ്പെടുത്തണമെന്നാണ് ഐ.സി.എഫിന്റെ ആവശ്യം. ഈ വിഭാഗത്തിലെ സീറ്റുകളില് പരമാവധി 50 ശതമാനം വരെ അര്ഹരായ പ്രവാസി അപേക്ഷകര്ക്കായി സംവരണം ചെയ്യുന്നത് കേന്ദ്ര സര്ക്കാര് പരിഗണിക്കണം. ഇക്കാര്യം ഉന്നയിച്ച് കേന്ദ്ര ന്യൂനപക്ഷകാര്യ മന്ത്രാലയത്തിനും കേന്ദ്ര ഹജ്ജ് കമ്മിറ്റിക്കും ഐ.സി.എഫ് കത്തയച്ചു.
വാര്ത്തകള് വാട്സ്ആപ്പില് ലഭിക്കാന് ലിങ്കില് ക്ലിക്ക് ചെയ്യൂ…
വാര്ത്തകള് editor@sauditimesonline.com എന്ന വിലാസത്തില് ഇമെയില് ചെയ്യുക. വാര്ത്തകള് അയക്കുന്നവര് പേരും മൊബൈല് നമ്പരും എഴുതാന് മറക്കരുത്.
