ദുബൈ: പ്രവാസിയുടെ മൃതദേഹം നാട്ടിലെത്തിക്കാന് വൈകിയതില് എയര് ഇന്ത്യ എക്സ്പ്രസ് മലയാളി കുടുംബത്തെ ഖേദം അറിയിച്ചു. ദുബൈയില് മരിച്ച കൊല്ലം ഭരണിക്കാവ് സ്വദേശി സുഭാഷ് പിള്ളയുടെ (50) മൃതദേഹം ദുബൈയില് നിന്ന് തിരുവനന്തപുരത്തേക്ക് എത്തിക്കുന്നതിലാണ് വീഴ്ച വരുത്തിയത്.
വിമാനം വൈകിയതോടെ യാത്രക്കാരെ മറ്റൊരു വിമാനത്തില് അയച്ചു. എന്നാല് മൃതദേഹം ദുബൈയില് നിന്ന് ഷാര്ജയിലേക്ക് കൊണ്ടുപോകാന് കഴിഞ്ഞില്ല. ‘കുടുംബാംഗങ്ങള്ക്കുണ്ടായ അസൗകര്യത്തില് എയര് ഇന്ത്യ എക്സ്പ്രസ് ആത്മാര്ത്ഥമായി ക്ഷമ ചോദിക്കുന്നു. മറ്റ് യാത്രക്കാരെ ഷാര്ജ-തിരുവനന്തപുരം വിമാനത്തില് കൊണ്ടുപോകുന്നതിന് ക്രമീകരണം ചെയ്തു. പക്ഷേ ചുരുങ്ങിയ സമയത്തിനുള്ളില് മൃതദേഹം ദുബായില് നിന്ന് ഷാര്ജയിലെത്തിക്കാനായില്ല. ഇതോടെ ദുബൈയില് നിന്ന് തിരുവനന്തപുരത്തേക്ക് ഷെഡ്യൂള് ചെയ്ത അടുത്ത വിമാനം കുടുംബം തെരഞ്ഞെടുത്തു. ഈ പ്രതിസന്ധി ഘട്ടത്തില് ദുഃഖിതരായ കുടുംബത്തിന് ഹോട്ടല് താമസം ഉള്പ്പെടെ സാധ്യമായ എല്ലാ സഹായങ്ങളും എയര്ലൈന് നല്കി’ -എയര് ഇന്ത്യ എക്സ്പ്രസ് വ്യക്തമാക്കി.
ഈ മാസം 13ന് രാത്രി 8.45ന് പുറപ്പെടേണ്ട വിമാനം വൈകിയതോടെ സംസ്കാര ചടങ്ങും വൈകി. സംസ്കാരം സംബന്ധിച്ച വിവരം വിമാന ജീവനക്കാരെ അറിയിച്ചിട്ടും ബദല് സംവിധാനം ഒരുക്കാന് തയ്യാറായില്ലെന്നാണ് ബന്ധുക്കള് ആരോപിച്ചത്. വിമാനത്താവളത്തിലെ കാര്ഗോ വിഭാഗത്തിലായിരുന്നു മൃതദേഹം.
വാര്ത്തകള് വാട്സ്ആപ്പില് ലഭിക്കാന് ലിങ്കില് ക്ലിക്ക് ചെയ്യൂ…
വാര്ത്തകള് editor@sauditimesonline.com എന്ന വിലാസത്തില് ഇമെയില് ചെയ്യുക. വാര്ത്തകള് അയക്കുന്നവര് പേരും മൊബൈല് നമ്പരും എഴുതാന് മറക്കരുത്.
