റിയാദ്: പുതിയ അഞ്ച് റിയാല്‍ നോട്ട് പുറത്തിറക്കിയതായി കേന്ദ്ര ബാങ്കായ സൗദി മോണിറ്ററി അതോറിറ്റി (സാമ) അറിയിച്ചു. പെട്രോകെമിക്കല്‍ മെറ്റീരിയല്‍ ഉപയോഗിച്ചാണ് നോട്ട് തയ്യാറാക്കിയിട്ടുളളത്. ദേശീയ കറന്‍സി വികസന പദ്ധതിയുടെ ആദ്യ പടിയാണ് നൂതന സാങ്കേതിക വിദ്യ ഉപയോഗിച്ച് തയ്യാറാക്കിയ അഞ്ച് റിയാല്‍ നോട്ടെന്ന് സാമ അറിയിച്ചു.
സുരക്ഷാ സാങ്കേതിക വിദ്യകളും പരിസ്ഥിതി സൗഹൃദവുമാണ് പുതിയ നോട്ടിന്റെ പ്രത്യേകത. വ്യത്യസ്ത താപനില, ഈര്‍പ്പം തുടങ്ങിയവയെ പ്രതിരോധിക്കാന്‍ നോട്ടിന് കഴിയും. മടക്കപ്പെടുമ്പോള്‍ കേടുപാടുകള്‍ ഉണ്ടാകില്ല. കൈമാറി പോകുന്ന നോട്ടുകളില്‍ അഴുക്ക് പുരളുന്നത് സ്വാഭാവികമാണ്. ഇതിനെയും പ്രതിരോധിക്കാന്‍ ശേഷിയുളള പെട്രോമെിക്കല്‍ വസ്തുക്കള്‍ ഉപയോഗിച്ചാണ് നോട്ട് നിര്‍മ്മിച്ചിട്ടുളളത്.
പുതിയ നോട്ട് നാളെ മുതല്‍ വിപണിയില്‍ ലഭ്യമാകും. വിഷന്‍ 2030ന്റെ ലോഗോയില്‍ നിന്ന് പ്രചോദനം ഉള്‍ക്കൊണ്ടാണ് പുതിയ നോട്ടിന്റെ രൂപകല്‍പ്പന. ഭരണാധികാരി സല്‍മാന്‍ രാജാവിന്റെ ചിത്രം, എംറ്റി ക്വാര്‍ട്ടര്‍ മരുഭൂമിയിലെ ഷെയ്ബ എണ്ണപ്പാടം, സൗദിയിലെ കാട്ടുപൂക്കള്‍ എന്നിവ ഉള്‍പ്പെടുത്തിയ പുതിയ നോട്ട് ഏറെ ആകര്‍ഷകമാണ്.
വാര്‍ത്തകള്‍ editor@sauditimesonline.com എന്ന വിലാസത്തില്‍ ഇമെയില്‍ ചെയ്യുക. വാര്‍ത്തകള്‍ അയക്കുന്നവര്‍ പേരും മൊബൈല്‍ നമ്പരും എഴുതാന്‍ മറക്കരുത്‌.
