തിരുവനന്തപുരം: ഇറാം ഗ്രൂപ് സിഎംഡിയും പ്രവാസി ഭാരതീയ സമ്മാന്‍ ജേതാവുമായ ഡോ. സിദ്ദീഖ് അഹമ്മദിന് ‘സന്നദ്ധ സേവാ’ പുരസ്‌കാരം സമ്മാനിച്ചു. സമഗ്ര വികസനം ലക്ഷ്യമാക്കി ഷാഫി പറമ്പില്‍ എംഎല്‍എ രൂപംകൊടുത്ത ‘സ്മാര്‍ട്ട് പാലക്കാട്’ പദ്ധതിയുടെ ഭാഗമാണ് അവാര്‍ഡ്. നേരത്തെ നടന്ന അവാര്‍ഡ്ദാന പരിപാടിയില്‍ പങ്കെടുക്കാന്‍ കഴിയാത്തതിനെത്തുടര്‍ന്ന് കഴിഞ്ഞ ദിവസം നിയമ സഭാ മന്ദിരത്തില്‍ പ്രതിപക്ഷ നേതാവ് വി.ഡി സതീശന്‍ അവാര്‍ഡ് സമ്മാനിച്ചു. എം.എല്‍.എ ഷാഫി പറമ്പലില്‍ സാന്നിഹിതനായിരുന്നു.
അറബ് മേഖല കേന്ദ്രമാക്കി ലോകത്തിന്റെ വിവിധ ഭാഗങ്ങളില്‍ വ്യാപാരം പടുത്തുയര്‍ത്തി മലയാളികള്‍ ഉള്‍പ്പെടെ നിരവധിയാളുകള്‍ക്ക് തൊഴില്‍ നല്‍കാന്‍ ഡോ. സിദ്ദീഖ് അഹമ്മദിന് കഴിഞ്ഞു. മാത്രമല്ല, ഇ-ടോയ്‌ലറ്റ് സാങ്കേതിക വിദ്യ വികസിപ്പിച്ച് ഇന്ത്യ ഉള്‍പ്പെടെ വിവിധ രാജ്യങ്ങളില്‍ സ്ഥാപിച്ചതിന് രാജ്യം പ്രവാസി ഭാരതീയ സമ്മാന്‍ നല്‍കുകയും ചെയ്തു. ഇതിനുള്ള പാലക്കാടിന്റെ ആദരമാണ് സന്നദ്ധ സേവാ പുരസ്‌കാരമെന്ന് ഷാഫി പറമ്പില്‍ എംഎല്‍എ പറഞ്ഞു. ലോകത്തിന്റെ അതിരുകളിലേക്ക് വളരുമ്പോഴും പാലക്കാട്ടുകാരന്‍ എന്ന നിലയില്‍ സ്വന്തം നാടിന്റെ വികസന മേഖലകളില്‍ നല്‍കുന്ന സംഭാവനകള്‍ അദ്ദേഹത്തെ ആദരിക്കാന്‍ നിര്‍ബന്ധിക്കുകയായിരുന്നുവെന്നും അദ്ദേഹം പറഞ്ഞു.
ഉപരിപ്ലവമായ വികസന സങ്കല്‍പങ്ങള്‍ക്ക് പകരം നാടിന് ശാശ്വത പരിഹാരം ലഭ്യമാകുന്ന പ്രവര്‍ത്തനങ്ങളാണ് ഡോ. സിദ്ധീഖ് അഹമ്മദിന്റെ നേതൃത്വത്തില്‍ പാലക്കാട് നടന്നിട്ടുള്ളത്. വേനല്‍ക്കാലങ്ങളില്‍ കടുത്ത വരള്‍ച്ചയും തീക്കാറ്റും അനുഭവപ്പെടുന്ന പാലക്കാടിനെ തിരികെയെത്തിക്കുന്നതിനുള്ള ദൗത്യം തുടങ്ങിയത് ഡോ. സിദ്ധീഖ് അഹമ്മദാണ്. ഉപയോഗ്യ ശൂന്യമായ നൂറുകണക്കിന് ജലാശയങ്ങളും കിണറുകളും കുളങ്ങളും വൃത്തിയാക്കി. ജലസ്രോതസ്സുകളെ തിരികെയെത്തിച്ചു.
തടയണകള്‍ പണിഞ്ഞ് ജലക്ഷാത്തിന് പരിഹാരം കണ്ടെത്തി. ഒരു ലക്ഷത്തിലധികം വൃക്ഷതൈകള്‍ നട്ടു പിടിപ്പിക്കുന്ന പദ്ധതിക്കും തുടക്കമിട്ടു. പാലക്കാടിന്റെ കായിക മേഖലക്ക് പുതിയ ഉണര്‍വ്വും പ്രതീക്ഷയും നല്‍കി മുന്നോട്ട് നയിക്കാനും അദ്ദേഹത്തിന് കഴിഞ്ഞു. ലോക വ്യവസായത്തിന്റെ ഗതി നിര്‍ണ്ണയിക്കുന്ന അതിപ്രധാന മേലകളായ ഓയില്‍ ആന്റ് ഗ്യാസ്, പവര്‍ എന്നിവ കൂടാതെ നിര്‍മ്മാണം, ഉല്‍പ്പാദനം, ട്രാവല്‍സ്, ഹെല്‍ത്ത്, ഐ.ടി, മീഡിയ, ലോജിസ്റ്റിക്, ആട്ടോമോട്ടീവ്, ട്രേഡിംഗ്, വിദ്യഭ്യാസം തുടങ്ങിയ വൈവിധ്യ മേലകളില്‍ വിജയം വരിക്കാന്‍ കഴിഞ്ഞു എന്നതാണ് അദ്ദേഹത്തെ വ്യവസായ പ്രതിഭയാക്കുന്നത്. പാലക്കാട് മങ്കര, പനന്തറയില്‍ അഹമ്മദ് ഹാജി, മറിയുമ്മ ദമ്പതികളുടെ ഒമ്പതു മക്കളില്‍ ഇളയവനാണ് ഡോ. സിദ്ദീഖ് അഹമ്മദ്. നുഷൈബയാണ് ഭാര്യ, റിസ്വാന്‍, റിസാന, റിസ്വി എന്നിവര്‍ മക്കളാണ്.
വാര്‍ത്തകള്‍ editor@sauditimesonline.com എന്ന വിലാസത്തില്‍ ഇമെയില്‍ ചെയ്യുക. വാര്‍ത്തകള്‍ അയക്കുന്നവര്‍ പേരും മൊബൈല്‍ നമ്പരും എഴുതാന്‍ മറക്കരുത്‌.
