കോഴിക്കോട്: സൗദിയിലെ ബീഷയില്‍ വെടിയേറ്റ് മരിച്ച ഐസിഎഫ് പ്രവര്‍ത്തകന്‍ ബഷീറിന്റെ മയ്യിത്ത് ഐസിഎഫ് നേതാക്കളും പ്രവര്‍ത്തകരും ബന്ധുക്കളും ഏറ്റുവാങ്ങി. വിമാനത്താവളത്തില്‍ നിന്നു കാസര്‍കോടുളള വീട്ടിലെത്തിച്ച മയ്യിത്ത് ജൂലൈ 4ന് രാവിലെ ഏഴിനു ബന്തടുക്ക ഏണിയാടി ജുമാ മസ്ജിദില്‍ ഖബറടക്കി.
ജൂലൈ 3ന് (വ്യാഴം) പുലര്‍ച്ചെ മൂന്നിനറ ജിദ്ദയില്‍ നിന്നു ഇന്‍ഡിഗോ വിമാനത്തില്‍ ദല്‍ഹി ഹൈദരാബാദ് വഴിയാണ് മൃതദേഹം കോഴിക്കോട് എത്തിയത്. 8.30 ന് കോഴിക്കോട് വിമാനത്താവളത്തില്‍ എത്തിയ മയ്യിത്ത് ഐസിഎഫ് സൗദി നാഷണല്‍ പ്രസിഡന്റ് അബ്ദുല്‍ റഷീദ് സഖാഫിയുടെ നേതൃത്വത്തിലാണ് ഏറ്റുവാങ്ങിയത്. നിസ്‌കാരത്തിന് ശേഷം ആംബുലന്‍സില്‍ ബഷീറിന്റെ ജന്മനാട്ടിലേക്ക് കൊണ്ടു പോയി.
ഡല്‍ഹിയില്‍ നിന്നു കോഴിക്കോട്ടേക്കുള്ള ഇന്‍ഡിഗോ വിമാനത്തിലായിരുന്നു ജനാസ എത്തേണ്ടിയിരുന്നത്. വിമാനം റദ്ദാക്കിയതിനാല്‍ ഇന്ന് എത്തിച്ചേരുമെന്നു ഉറപ്പ് ലഭിച്ചിരുന്നില്ല. കാസര്‍ഗോഡ് എംപി രാജ്‌മോഹന്‍ ഉണ്ണിത്താന്‍ ഇടപെട്ടാണ് ഹൈദരാബാദ് വഴി കോഴക്കോട്ടേക്കുള്ള വിമാനത്തില്‍ എത്തിച്ചത്.
ഐസിഎഫ് ഇന്റര്‍നാഷണല്‍ സെക്രട്ടറി ബഷീര്‍ ഉള്ളണം, നാഷണല്‍ ഡെപ്യൂട്ടി പ്രസിഡന്റ് മുജീബ് എആര്‍ നഗര്‍, സൗദി വെസ്റ്റ് ചാപ്റ്റര്‍ സെക്രട്ടറി ഷാഫി ബാഖവി മീനടത്തൂര്‍, ജാഫര്‍ താനൂര്‍, മുഹിയുദ്ധീന്‍ കുട്ടി സഖാഫി, മുജീബ് പിഎംആര്‍, അന്‍സാര്‍, ഇസ്ഹാഖ്, അബൂമിസ്ബാഹ് അയിക്കരപ്പടി, അഷ്‌റഫ് പേങ്ങാട്, അബ്ദുറഷീദ് നജ്‌റാന്‍, നിസാമി ഉസ്താദ്, ഹസന്‍ സഖാഫി തറയിട്ടാല്‍, അസ്‌ലം സഅദി തുടങ്ങി ഐസിഎഫ് നേതാക്കള്‍ വിമാനത്താവളത്തില്‍ എത്തിയിരുന്നു.
മെയ് 31 ശനി രാത്രിയാണ് കാസറഗോഡ് സ്വദേശി ഏണിയാടി കുറ്റിക്കോല്‍ ബഷീര്‍ അജ്ഞാതരുടെ വെടിയേറ്റു കൊല്ലപ്പെട്ടത്. ബിഷ നഗിയയില്‍ ബഷീര്‍ ഓടിക്കുന്ന വാഹനം വൃത്തിയാക്കുന്നതിനിടയില്‍ അജ്ഞാതന്‍ വാഹനത്തില്‍ എത്തി വെടിവെക്കുകയായിരുന്നു. ശബ്ദം കേട്ട് സമീപ വാസികള്‍ എത്തുമ്പോള്‍ ബഷീര്‍ വാഹനത്തിന് സമീപം വീണു കിടക്കുന്നതാണ് കണ്ടത്. പോലീസെത്തി ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. പോലീസ് അന്വേഷണത്തില്‍ പ്രതിയെന്നു കരുതുന്ന സഊദ് അബ്ദുല്ല അല്‍ മുഈനി എന്നയാളെ അറസ്റ്റ് ചെയ്തു. കൊലപ്പെടുത്താനുള്ള കാരണം വ്യക്തമല്ല.
15 വര്‍ഷമായി ടാക്‌സി െ്രെഡവറായി ജോലി ചെയ്തു വരികയായിരുന്നു. ബിഷ ഐസിഎഫ് യൂണിറ്റ് ക്ഷേമകാര്യ സെക്രട്ടറിയാണ് മരിച്ച ബഷീര്‍, ബിഷയിലും സ്വദേശത്തും സാന്ത്വന പ്രവര്‍ത്തങ്ങളില്‍ സജീവമായിരുന്നു. പിതാവ്: പരേതനായ മുഹമ്മദ് കുഞ്ഞി, മാതാവ്: പരേതയായ മറിയുമ്മ, ഭാര്യ: നസ്‌റീന്‍ ബീഗം ഉപ്പള, മക്കള്‍: മറിയം ഫിദ (9), മുഹമ്മദ് ബിലാല്‍ (7), അബ്ദുല്ല ആദില്‍(2), സഹോദരങ്ങള്‍: അബൂബക്കര്‍ കുമ്പക്കോട്, അസൈനാര്‍ കുമ്പക്കോട്, കരീം കുമ്പക്കോട്, റസാഖ് കുമ്പക്കോട്, എം സുലൈഖ ബെണ്ടിച്ചാല്‍, ബീ ഫാത്തിമ കോളിയടുക്കം, എം ഖദീജ കൊട്ടിയാടി, പരേതയായ സുഹറ ചട്ടച്ചാല്‍.
പ്രദേശത്തെ സാമൂഹിക പ്രവര്‍ത്തകനും ഐസിഎഫ് പ്രവര്‍ത്തകനുമായ അബ്ദുല്‍ അസീസ് കുന്നുംപുറം ഐസിഎഫ് നാഷണല്‍ സെക്രട്ടറി സിറാജ് കുറ്റിയാടി, ക്ഷേമകാര്യ സെക്രട്ടറി ലുഖ്മാന്‍ പാഴൂര്‍, ഹാരിസ് പട്‌ല, റിയാദ് ഐസിഎഫ് സെക്രട്ടറി ഇബ്രാഹീം കരീം, മുജീബുറഹ്മാന്‍ സഖാഫി എന്നിവരുടെ നേതൃത്വത്തിലായിരുന്നു നിയമ നടപടികള്‍ പൂര്‍ത്തിയാക്കിയത്
വാര്‍ത്തകള്‍ editor@sauditimesonline.com എന്ന വിലാസത്തില്‍ ഇമെയില്‍ ചെയ്യുക. വാര്‍ത്തകള്‍ അയക്കുന്നവര്‍ പേരും മൊബൈല്‍ നമ്പരും എഴുതാന്‍ മറക്കരുത്‌.
