കൊവിഡ് കുതിക്കുന്നു; 15 ദിവസത്തിനിടെ പതിനഞ്ചിരട്ടി വര്‍ധനവ്
റിയാദ്: സൗദിയില്‍ വീണ്ടും കൊവിഡ് ബാധിതരുടെ എണ്ണത്തില്‍ വര്‍ധനവ്. 15 ദിവസത്തിനിടെ പതിനഞ്ചിരട്ടി വര്‍ധനവാണ് രേഖപ്പെടുത്തിയത്. ഡിസംബര്‍ 19ന് 104 പേര്‍ക്കായിരുന്നു വൈറസ് ബാധ. എന്നാല്‍ ജനുവരി 3ന് ആരോഗ്യ മന്ത്രാലയം പുറത്തുവിട്ട പ്രതിദിന കൊവിഡ് ബാധിതരുടെ എണ്ണം 1746 ആണ്. 314 പേര്‍ രോഗമുക്തി നേടി. രണ്ടുപേര്‍ മരിച്ചു. രാജ്യത്തെ വിവിധ പ്രവിശ്യകളില്‍ 90 പേര്‍ തീവ്രപരിചരണ വിഭാഗത്തില്‍ ചികിത്സയില്‍ കഴിയുന്നുണ്ടെന്നും ആരോഗ്യ മന്ത്രാലയം അറിയിച്ചു. അതിനിടെ, പൊതുയിടങ്ങളില്‍ മാസ്‌ക് നിര്‍ബന്ധമായും ധരിക്കണമെന്ന് അധികൃതര്‍ ആവശ്യപ്പെട്ടു.
